Ecoleg

Reidiau, llennyrch a sgalops

Mae agoriadau a chynefinoedd yr ymylon mewn coetiroedd yn cynnig mannau cynnes, heulog. Lle caiff cynefinoedd ymylon eu rheoli'n gywir i gynnal golau'r haul, ni fyddant yn dychwelyd yn goetir trwchus. Mae cynefinoedd ymylon fwyaf buddiol pan fo newid graddol o goed aeddfed, i goed ifanc, i brysgwydd a llystyfiant, i laswelltir. Mae hyn yn cynnig mosaig o gynefin ag ardaloedd cysgodol a chyda mwy o olau, sy'n cynnig eu hunain i amrywiaeth o fflora a ffawna. Mae'r ardaloedd hyn yn gynefin pwysig i rywogaethau torheulo fel infertebratau ac ymlusgiaid. Mae llawer o wyfynod a gloÿnnod byw yn dibynnu ar y perlysiau, y llwyni neu'r coed ifanc newydd sy'n tyfu'n isel ac sydd i'w cael ar ymylon ac agoriadau mewn coetiroedd.

Mae Reidiau coetir yn llwybrau llinol drwy goetir a ffurfir gan lwybrau a thraciau coetir. Gellir creu reidiau coetir o'r Dwyrain i'r Gorllewin gyda'r bwriad o gynyddu bioamrywiaeth. Mae'r cyfeiriadu yma yn sicrhau lefelau da o olau'r haul gydol y dydd, gan annog amrywiaeth o lystyfiant yn ogystal â rhywogaethau torheulo. Dylai reidiau coetir fod yn lletach nag uchder y goeden dalaf, hyd at 30 metr, er mwyn lleihau cysgodi.

Mae llannerch yn agoriad mewn coetir, er enghraifft ardal o brysgoedio diweddar. Mae argaeledd digon o olau'r haul yn cynnig golau a chynhesrwydd sy'n caniatáu i flodau coetir dyfu. Mae llennyrch yn rhoi mwy o fanteision i fioamrywiaeth pan fo coed ar yr ymylon, sy'n rhoi rhywfaint o gysgod.

Mae sgalop neu gromlin yn ardaloedd agored hanner cylch ar hyd ymyl reid coetir, sydd wedi'i glirio i ganiatáu i lwyni, llystyfiant a glaswellt dyfu. Mae ymylon amrywiol coetiroedd yn cynnig manteision i amrywiaeth o fflora a ffawna coetiroedd brodorol.